अमेरिकेतील रम्य दिवस - एप्रिल 2009

आम्ही १० एप्रिलला मुंबई वरुन निघुन न्युयार्कला ११ तारखेला पोचलो. हे अंतर १२८३२ हवाई मैल इतके आहे. मुंबई ते न्युयार्कसाठी १६ तास लागले. विमानातून जाताना खुप सुन्दर सुन्दर दृश्य दिसत होती. विमान ढगा वरुन जाताना असे वाटत होते की, जसा काय कापुस पिंजुन ठेवलेला आहे. पहिल्यांदाच अमेरिकेला येत असल्याने खुप उत्सुकता होती. लहानपणी खुप ऐकले होते, त्यामुळे अमेरिका बघण्याची खुप इच्छा होती. जगातील सर्वात श्रीमंत देश, महासत्ता म्हणुन पण पाहण्याची इच्छा होती. एअरपोर्ट वर जावई पुष्पगुच्छ घेवुन स्वागताला तयार होते. बाहेर मोठी होंडा गाड़ी घेवुन आले होते. मुलीने औक्षण करुन जंगी स्वागत केले.

१७/४/09 - चेरी ब्लोस्सम फेस्टिवल
आल्या बरोबर लगेचच आम्ही न्युयार्कला चेरी ब्लोस्सम फेस्टिवल पाहण्यासाठी गेलो. चेरीच्या झाडाला प्रथम फुले {गुलाबी आणि पांढरी} येतात, ती फुले गळुन त्याला फळे येतात. अशी हजारो झाडे एक ओळिने लावलेली होती. ते इतके सुन्दर दिसत होते की अवर्णनिय आहे. गार्डनमधे सुंदर कारंजी होती आणि गुलाबी पांढर्‍या फुलांची सुंदर झाडे होती. झाडे फुलानी भरगच्च फुलली होती. भरपुर गर्दी होती, वातावरण एकदम प्रसन्न वाटत होते. तिथे लग्नाचे वर्‍हाडी फोटो काढायला आले होते.

येथील सगळ्याच गोष्टी मला भारत पेक्षा वेगळ्या वाटल्या. पार्लर पुरुष, बायका एकत्रच चालवतात. लायब्ररी तर विचारूच नका. तिथे खुप पुस्तके होती आणि बर्‍याच सोई सुविधा पण होत्या. लहान मुलांसाठी तर खुपच पुस्तके होती, तसेच सी.डी. पण होत्या. भांडी घासण्यासाठी डिश वॉशर तर कपड्याला फ़क्त वॉशिंग मशीन. घरात धुर झाला की फायर अलार्म वाजतो. घरे सगळी लाकडाची असतात, कारण तापमान इथे शुन्यच्या खाली १० ते १५ वर जाते. रस्त्यावर फ़क्त कारच कार दुसरे वाहनच नाही, दुचाकी तर फार विरळच. उन्हाला तर फ़क्त में महिना ते ऑगस्ट नंतर बाकीचे सर्व महीने थंडी आणि काही दिवस बर्फ. उन्हाळ्यात मात्र सगळी धरती हिरव्या शालुने नटलेली असते आणि रंगी बेरंगी फूले उमललेली असतात. खुपच सुन्दर दृश्य असते.

फळे, भाज्य सर्वच खुप मोठ मोठे असतात. भारतीय दुकानात सर्व भाज्या मिळतात. अगदी केळीची पाने आणि कारली पण मिळतात, वॉशिंग मशीन पैसे टाकुन सुरु होते तर धुवायला २० मिनिटे आणि ड्रायर ला ८० मिनिटे लागतात. कपडे पूर्ण सुकुन निघतात. आम्ही आलो तेव्हा सर्व झाडांची पाने पुर्ण गळुन पडली होती, झाडे निष्पर्ण झाली होती. काही दिवसानी त्याला चॉकलेटी पाने आली, नंतर थोडा पोपटी कलर होता आणि नंतर त्याचा रंग हिरवा झाला. आता सर्व झाडांची पाने लाल आणि पिवळी होत आहेत त्याला इथे फॉल कलर म्हणतात. सगळीकडे अशी रंगी बेरंगी झाडे पाहून खुपच छान वाटते. ऑक्टोबरमधे हॅलोविन हा सण असतो त्यावेळी लाल भोपळ्याचे खुप महत्त्व असते. सगळीकडे भोपळेच भोपळे दिसतात. मुले वेगवेगळी वेशभूषा करून घरोघरी चॉकलेट मागायला जातात दिले नाही तर तुम्हाला भीती दाखवू असे सांगतात गमतीने. मुले भुताखेताचे पण ड्रेस घालतात. हा सण म्हणजे आपला इथे जसं पित्र असतं तसं. इथे समज आहे की त्या दिवशी आत्मे जमिनीवर येतात आणि त्यांना शांती मिळावी म्हणुन संध्याकाळी खिडक्यांमधे दिवे लावुन पदार्थ ठेवतात. 
त्यानंतर नोव्हेंबरमधे थँक्स गिविंग म्हणुन फेस्टिवल असतो, हा सण आपल्या संक्रांतीसारखा असतो. नवीन पिक निघालेले असते आणि त्यासाठी देवाचे आभार म्हणुन साजरा करतात. ह्या सणा दरम्यान रस्त्यावर परेड काढतात, ज्यात मोठे मोठे फुग्याचे कॅरॅक्टर बनवतात.